МЕЛБУРН – Надлежните од Министерството за здравство на Австралија во официјалната документација доставена до судот посочуваат дека најдобриот тенисер во светот Новак Ѓоковиќ не претставува опасност за земјата.
Претходно беше објавено дека Ѓоковиќ добил позитивен тест за корона вирусот на 16 декември, а негативен на 22 декември.
Тој е асимптоматски од 27 декември, па прашање е како може да биде закана за околината.
„Користејќи ги горенаведените претпоставки, можеме да потврдиме дека Новак Ѓоковиќ бил заразен со корона вирусот, па иако не бил вакциниран, тоа значи дека е заштитен од ковид во следните неколку месеци“, се наведува во судската документација, пренесува Танјуг.
Неговиот негативен тест кој го доби на 22 декември покажува и дека се заразил со вирусот и дека има антитела, се посочува.
„Не е голема веројатноста да биде опасно, затоа цениме дека тоа не е ризик за Австралијците“, се вели во судското досие.
