МАИНЦ – Германскиот производител на вакцини BioNTech во вторникот објави дека неговиот бизнис во третиот квартал и во првите девет месеци од оваа година е поддржан од продажбата на вакцината против Ковид-19, што треба да му донесе до 17 милијарди евра приход оваа година.
Во третиот квартал оствари нето добивка од околу 3,2 милијарди евра, додека во истиот период лани работеше со загуба од околу 210 милиони евра, покажа финансискиот извештај.
Во периодот од јули до септември приходите на BioNTech скокнале на речиси 6,1 милијарди евра, наспроти 67,5 милиони евра во истиот период лани.
Скокот на приходите е резултат на брзото зголемување на понудата и продажбата на вакцини против коронавирус на глобално ниво, кои германската биотехнолошка компанија ги разви во соработка со американскиот Pfizer.
Во првите девет месеци од оваа година приходите на BioNTech достигнаа 13,44 милијарди евра, во споредба со нешто помалку од 140 милиони евра во истиот период минатата година.
Нето добивката за периодот од јануари до крајот на септември достигна 7,1 милијарда, наспроти загубата од 352 милиони евра во истиот период во 2020 година, покажа извештајот.
Компанијата сега очекува приход од вакцината против Ковид-19 во опсег од 16 до 17 милијарди евра оваа година, врз основа на проектираните испораки до 2,5 милијарди дози. Во август, таа беше проценета на 15,9 милијарди евра врз основа на тогаш договорената испорака од 2,2 милијарди дози.
