Францускиот производител на автомобили Рено во 2020 година забележа историска загуба од осум милијарди евра, што беше обележано со пандемијата на коронавирус, покажуваат податоците објавени денес, пренесува Бета, повикувајќи се на АП.
Оваа загуба главно е поврзана со јапонскиот партнер Нисан бидејќи Рено има 43 проценти удел во групата.
Рено исто така доживеа пад на продажбата за 21,3 проценти во 2020 година, со продадени помалку од три милиони возила.
Групата забележа пад од 7,3 милијарди евра во првата половина на годината поради пандемијата, но загубата ја ограничи на 660 милиони евра во втората половина на годината со помал промет за 8,9 проценти.
Елиминација на 15.000 работни места
Француската компанија не објави прогнози за 2021 година. Има акумулирано резерви во вредност од 16,4 милијарди евра, вклучително и четири милијарди од заеми загарантирани од државата.
Рено, кој имаше проблеми и пред кризата, на крајот на мај 2020 година објави план за заштеда на две милијарди евра во следните три години, вклучително и елиминирање на 15.000 работни места ширум светот.
Во јануари беше најавено ново кратење на буџетот, особено за истражување, но без нови отпуштања. Целта е да се заштедат 2,5 милијарди евра до 2023 година, и три милијарди евра до 2025 година.
