Во регионот, Македонија е на 94-то место според скалата на среќата и тоа ја прави земја со најмалку среќни граѓани. Веднаш потоа следува Албанија на 93-то место, а Косово е на високото 33-то место. Словенија е на 29-то место, потоа Србија на 48-то место, па Хрватска на 60-то место, Босна и Херцеговина на 64-то место, Црна Гора на 72-то место и Бугарија на 88-то место.

Додека Балканот сè уште ги трпи последиците од транзицијата и лошиот животен стандард особено во време на светска финансиска криза, се чини дека нордиските земји и оваа, како и секоја претходна година се најсреќните во светот.

Убедливо најсреќни граѓани во светот има Финска, по што следуваат Данска, Швајцарија, Исланд, Холандија, Норвешка, Шведска, Луксембург и Нов Зеланд, која е првата земја на листата надвор од Европа. Во топ 10 земји во кои граѓаните се чувствуваат задоволено и исполнето се наоѓа и Австрија.

Соединетите Американски држави се на 20-то место, Германија на 13-то, а на дното на табелата се наоѓаат Руанда, Зимбабве и Авганистан.

Пиедесталот за Финска претставува задоволство на нацијата од јавните услуги, природните богатства, високиот животен стандард и особено од мерките за заштита од Covid 19, превземени од нивната власт со што се создало чувство на взаемна доверба што пак помогнало да се заштитат животите и егзистенциите во најтешките времиња.

Судејќи по ова, во време на пандемија, веројатно македонските граѓани ја плаќаат најскапата економска цена во регионот и цената по менталното здравје на населението, па затоа се и на дното во рангот на среќни земји на Балканот.