Врховниот суд на Португалија изрекол пресуда со која еден Португалец треба да ѝ плати на својата поранешна сопруга 60.000 евра како компензација за чистењето и готвењето што ги извршила за време на нивниот 30-годишен брак.
Активностите во домаќинството долго време се сметаа само за домашна задача на сопругата, но во светот има сè повеќе судски случаи во кои домаќинките бараат отштета од поранешните сопружници и ја добиваат. Последниот ваков случај доаѓа од Португалија.
Жената првично побарала 240.000 евра од поранешниот сопруг за целата работа што ја сторила бесплатно за време на нивниот брак како чистење, готвење, перење, пеглање, но нејзината пресуда била поништена со образложение дека нема право на паричен надоместок. Откако сопругата поднела жалба, судот донел одлука дека домашните работи, „иако остануваат невидливи, имаат јасна економска вредност“.
Докажано било дека за 30 години за кои брачниот пар бил во заедница, сопругата била таа што се грижела за куќата и ги подготвувала оброците на партнерот. Врховниот суд утврдил дека ова довело до збогатување на членот на двојката кој не учествувал во домашна работа бидејќи му било дозволено да има корист од резултатите од тие активности без активни трошоци и придонеси..
Судот ја утврдил финансиската вредност на домашната работа што ја извршила жената со користење на национална минимална плата како критериум, множејќи ја со 12 месеци, за 30 години брак. Третина од сумата била одземена како трошоци на жената во тој период.
