Албанија ја доживува најтешката демографска криза во регионот, при што 1,7 милиони луѓе или 37 отсто од населението ја напуштиле земјата во последните три децении, се вели во извештајот на Истражувањето за населението на Обединетите нации.
Според извештајот на ОН, нацијата од речиси три милиони жители се очекува да падне под еден милион до крајот на овој век, јавуваат косовските медиуми.
По Албанија, Македонија е исто така во лоша демографска ситуација, со една четвртина од населението кое ја напуштило земјата од почетокот на 1990-тите.
Последниот попис спроведен на крајот на 2021 година покажува пад на населението од 10 проценти само во последните две децении. Речиси 600.000 Македонци се иселиле во странство во децениите по осамостојувањето на земјата.
И Албанија и Северна Македонија се надеваат дека брзото членство во Европската унија ќе обезбеди подобра иднина и ќе го промени моделот на миграција. Напредокот во ЕУ на Северна Македонија и Албанија сега е закочен поради ветото на Бугарија.
Друга балканска земја која е тешко погодена од намалувањето на населението е Србија. Според Светска банка, земјата со речиси седум милиони жители се очекува да има милион жители помалку до 2050 година. Србија секоја година практично губи по еден град. Стотици илјади Срби ја напуштија земјата по војните и распадот на поранешна Југославија во 1990-тите.
Некои од причините зошто балканскиот регион доживеа брза миграција во текот на децениите може да се проследи до распадот на поранешна Југославија, граѓанските војни и економските тешкотии што следеа. Босна и Херцеговина е веројатно најтешко погодената земја во регионот.
Некои студии покажуваат дека речиси половина од граѓаните родени во Западен Балкан повеќе не живеат таму.
Друг пример за влијанието на феноменот на емиграцијата е Косово, кое загуби 15,4 отсто од своето население меѓу 2007 и 2018 година.
