БРИСЕЛ – Шефот на дипломатијата на Европската унија, Жосеф Борел, изјави пред Советот за безбедност на ООН дека „ЕУ нема да застане додека земјите од Западен Балкан не станат дел од ЕУ“.
„За таа цел, ние сме целосно мобилизирани да ги поддржиме помирувањето и реформите како најдобар противотров на националистичката реторика“, рече Жосеф Борел.
Во својот говор, тој најави дека следната недела во Брисел ќе се одржи нов состанок на дијалогот меѓу Белград и Приштина, организиран од ЕУ.
На сесијата посветена на соработката меѓу ООН и ЕУ, Жосеф Борел пред Советот за безбедност на ООН зборуваше за улогата и поддршката што ЕУ ги дава за одржување на глобалниот мир и безбедност, соработката со ООН и регионалните организации.
Тој ги наведе Западен Балкан како примери за „длабокиот ангажман“ на ЕУ, каде што се потребни „итни резултати“.
Покрај Западен Балкан, Жосеф Борел ги спомена и Белорусија, Украина и Блискиот исток.
„Општо кажано, ние не сакаме геостратешка конкуренција во Европа. Сакаме мирно, просперитетно и стабилно соседство, без таканаречени долгорочни конфликти и зони на влијание“, нагласи Жосеф Борел.
Тој повика на заживување на мултилатерализмот заснован на меѓународното право и истакна дека ЕУ останува посветена на соработката и принципите на ООН.
