ПЕКИНГ – Кинескиот производител на паметни телефони Xiaomi во средата објави дека неговите приходи во првиот квартал од оваа година скокнале 55% од истиот период минатата година, поддржани од силни пратки на паметни телефони.
Во првите три месеци од оваа година, приходите на Xiaomi достигнаа така 76,9 милијарди јуани (12 милијарди долари), соопшти кинеската компанија.
Нето добивката скокна на 7,8 милијарди јуани, од 2,15 милијарди јуани во истиот период минатата година.
Продажбата на паметни телефони во првиот квартал порасна за 69,8 проценти на годишно ниво до 51,5 милијарди јуани. Приходите од Интернет услугите истовремено се зголемија за 11,4 проценти, на 6,6 милијарди јуани.
Уделот на Xiaomi на пазарот за паметни телефони во Кина се зголеми за 75 проценти во првиот квартал во споредба со истиот период минатата година, според истражувачката агенција Canalys, бидејќи Huawei се повлече од тој пазар откако американските трговски санкции ја ограничија можноста за набавка на клучни компоненти за неговите паметни телефони .
Xiaomi и другите електронски брендови сè уште се погодени од глобалниот недостиг на чипови, потсетува Ројтерс.
Бројни причини, како што се складирање, скок на побарувачката за персонални компјутери за време на пандемијата и проблеми во фабриките, поттикнаа многу производители на хардвер да бараат повеќе чипови кон крајот на минатата година.
Во првиот квартал од оваа година, Xiaomi објави дека официјално ќе започне со производство на електрични автомобили, а новиот деловен сегмент треба да го води основачот на Xiaomi, Леи Џунун, потсетува Ројтерс.
