Институтот на отворено општество во Софија со анализа за балканските земји на тема „Отпорност на лажни вести за време на инфодемијата на Ковид-19“. Според овој извештај и индекс на медиумска писменост 2021, земјите од Западен Балкан се најчувствителни на лажните вести и дезинформациите, кои предизвикуваат негативни ефекти врз ставовите и размислувањата на населението. Неможноста на Балканците да се спротистават на шпекулациите се должи на состојбата на слобода на медиумите и образованието.
На последното место во Индексот за медиумска писменост објавен од Институтот е Македонија, потоа Босна и Херцеговина, Албанија и Црна Гора. Србија е на 29. место од 35 европски земји опфатени со истражувањето. Финска, Данска, Естонија, Шведска и Ирска имаат најголем отпор кон лажни вести и дезинформации благодарение на квалитетот на образованието, медиумската слобода и меѓусебната доверба во општеството.
Показатели на медиумска писменост што се користат во Индексот се слободата на медиумите, образованието, електронското учество, политичката поларизација и довербата во луѓето.
Препораката е дека оптимален пристап во справувањето со лажни вести може да се постигне само преку образованието. Справувањето со лажните вести и дезинформации ќе го намали нивото на политичка и социјална конфронтација, ќе ја зголеми довербата во општествата и ќе придонесе за „поздрава“ околина.
